Agoma kumshitaki mume aliyemjeruhi

MKAZI wa Kijiji cha Kapiliula, wilayani Urambo, Magdalena Nsimba,  aliyenusurika kifo baada ya kucharangwa mapanga na mumewe kwa madai ya kukataa kumpa sh 1,000 ya kununulia pombe, amekataa mumewe huyo kushitakiwa.

Ofisa Mtendaji wa kata hiyo, Salumu Kululinda, alisema baada ya mtuhumiwa kukabidhiwa mikononi mwa polisi na kusota rumande kwa siku 14 aliachiliwa kwa kukosekana kwa ushahidi.

Kululinda alisema kuachiliwa kwa mtuhumiwa kunatokana na kitendo cha Magdalena kumuonea huruma, hivyo kuamua kumsamehe mumewe.

Alisema mama huyo alieleza kutokana na mazingira ya kijijini kuwa magumu aliona ni vema akubali kumsamehe mumewe, ingawa amejeruhiwa vibaya, ili wasaidiane kulea watoto wao.

Awali akisimulia mkasa huo, Magdalena, alisema siku hiyo, saa 2 usiku  mumewe, Batholomeo John, aliyezaa naye watoto wanne alimtaka ampatie sh 1,000, lakini alikataa kwa kuzingatia  maisha ya kijijini na muda.

Alisema kutokana na hali hiyo, mumewe alimkata kwa panga maeneo mbalimbali mwilini na wananchi kwa ushirikiano na uongozi wa serikali ya kata walimkamata na kumfikisha katika Kituo cha Polisi Urambo.

Hata hivyo, pamoja na kulalamikia kufanyiwa ukatili huo, Magdalena alisema hawezi kuachana na mumewe na kwamba hayuko tayari kukubali afungwe.

Hata hivyo uchunguzi uliofanywa umebaini chanzo cha shauri hilo kutofikishwa mahakamani ni kutokana na Magdalena kukataa kutoa ushirikiano kwa vyombo vya dola, akihofia usalama wa maisha yake kutokana na vitisho vya mumewe.

Ofisa Mtendaji wa kijiji hicho, Grecy Lumanyika, alisema kina mama wengi  wa vijijini wamekuwa wakifanyiwa ukatili, lakini serikali inapofuatilia wanakataa kutoa ushirikiano.

Baadhi ya wananchi waliozungumzia tukio hilo, akiwemo Salma Mohamed, wameshauri elimu itolewe juu ya haki za binadamu kwa  kina mama  na wananchi wengine wasiojua.

Chanzo;Tanzania Daima