BASI LA TAQWA LAUA DEREVA WAKE

BASI la Kampuni ya Taqwa lenye namba ya usajili T 532 BYJ lililokuwa likielekea nchini Burundi, limegonga magari mawili na kusababisha kifo cha dereva wake na kujeruhi baadhi ya abiria na watu wengine.

Ajali hiyo ilitokea wilayani Nzega, Tabora jana ambapo Kamanda wa Polisi mkoani hapa, Kamishna Msaidizi wa Polisi, Peter Ouma, alithibitisha kutokea juzi saa 2 usiku kwenye Kijiji cha Miguwa.

Dereva wa basi la Taqwa, Adam Msindo, alifariki dunia katika ajali hiyo inayodaiwa kusababishwa na uzembe wa dereva huyo wa kutochukua tahadhari wakati analipita gari aina ya Fusso akiwa mwendo kasi.

Kwa mujibu wa Kamanda Ouma, katika ajali hiyo basi la Taqwa lilikuwa likitokea jijini  Dar es Salaam kwenda Bujumbura, Burundi.

Basi hilo lililigonga ubavuni Fusso lenye namba ya usajili T 134 ACQ lililokuwa likiendeshwa na Juma Ramadhan akitokea Simbo wilayani Igunga kuelekea Tinde, Shinyanga.

Kamanda Ouma ameongeza kuwa  kisha basi hilo  likagongana uso kwa uso na gari jingine aina ya Scania lenye namba za usajili T 967 APQ na tela lake lenye namba T 984 AGK lililokuwa likiendeshwa na Halfan Hussein

Chanzo;Tanzania Daima