MNYIKA;WAALITI HAWAPONI CHADEMA

CHAMA cha Demokrasia na Maendeleo (CHADEMA) kimesema kitaendelea kutimua wasaliti na kutaka wananchi kuendelea kuwaunga mkono kwenye
operesheni maalumu ya M4C Pamoja Daima.

Mbunge wa Ubungo, John Mnyika, alisema hayo kwenye viwanja vya Shule ya Sekondari Uyui wakati akiongea na wananchi kwenye mkutano wa
hadhara.

Mnyika alisema hayo baada ya awali kukaribisha maswali ya wananchi ambao karibu wote waliopata nafasi ya kuuliza walilenga kutaka kujua ni vipi suala la Zitto Kabwe litamalizwa.

Akijibu maswali hayo Mnyika alisema CHADEMA inaendesha mambo yake kwa kuzingatia kanuni, taratibu na sheria, hivyo suala la Zitto lilishamalizwa, lakini chama kitaendelea kutimua wasaliti wote.

”Ndani ya CHADEMA hakuna kulindana kama CCM wanavyofanya, na madhara yake leo tunayaona nchi inashindwa kupiga hatua.

”CCM wamekuwa wakilindana na ndiyo maana hawana utaratibu wa kuwajibishana… sisi hatuna hiyo stahili, tutaendelea kuchukua hatua,” alisema Mnyika.

Alitolea mfano mwaka 2009 usaliti ndani ya chama ulianza kwa baadhi ya viongozi, pia mwaka 2010 baadhi ya viongozi walisaidia viongozi wa CCM kushinda uchaguzi wa majimbo.

Alisema maadui wa CHADEMA kisiasa wamekuwa wakipandikiza mamluki ili kusaliti nguvu ya CHADEMA, na kwamba suala la chama kutimua viongozi ni utaratibu wa kikatiba.

Alisema kitendo cha Zitto kukimbilia mahakamani, kwa kanuni za CHADEMA amejivua uanachama mwenyewe na yeye analitambua hilo.

Akijibu swali la vijana kupata elimu hasa katika mikopo, alisema msimamo wa CHADEMA haukubaliani na mfumo mzima uliopo, ikiwemo bodi yenyewe ya mikopo.

Alisema suala la elimu ni haki ya vijana, hivyo ni haki na siyo jambo la kukopeshana licha ya kuwa ni suala la kikatiba Makamu Mwenyekiti wa CHADEMA taifa, Said Issa Mohammed, aliwataka wananchi kushirikiana, kushikamana ili kuiangusha CCM kwenye uchaguzi wa serikali za mitaa.

Alisema kitaaluma yeye ni mwalimu na kwamba anachoona katika mikutano ya CHADEMA, virungu na mabomu yanayopigwa na askari polisi, ni askari hao kuwashangaa wananchi kuchelewa kuiondoa CCM madarakani.

Aligusia elimu na kushangazwa na watoto wa Kitanzania wanapokwenda shule hubeba panga na jembe huku wenzetu wa Uganda watoto wa darasa la pili wanaenda shule na kompyuta za mkononi (Laptop).

Kuhusu chama hicho kuhusishwa na ukanda, Uchaga ama chama cha kikanda, alisema wanaoeneza ujinga huo wanatakiwa kupimwa akili kwani kinachoangaliwa ndani ya CHADEMA ni uadilifu na uwezo kwani chama hicho ni mali ya wananchi na si uongozi.

Makamu mwenyekiti huyo aliongeza kuwa CCM wameandaa mikakati mingi ya kuwadhoofisha kwa kununua baadhi ya viongozi wao.

Chanzo:Tanzania Daima