SSRA YAWAFUNDA WAAJIRI TABORA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WAAJIRI nchini wametakiwa kuacha tabia ya kuwachagulia watumishi kujiunga na mifuko ya hifadhi ya jamii na pia wameaswa kupeleka michango ya wafanyakazi wao kwa wakati ili kuondoa usumbufu wanapostaafu.

Akizungumza kwenye semina iliyohusisha viongozi na watumishi wa wilaya zote saba za Mkoa wa Tabora, Katibu Tawala Msaidizi wa Mkoa wa Tabora, Steven Bushir, alisema mtumishi ndiye mwenye uamuzi wa kujiunga na mfuko autakao.

Alisema utaratibu wa kuwapangia watumishi  kujiunga na mifuko ya jamii umepitwa na wakati na ulishafanyiwa marekebisho ambapo hivi sasa mwajiriwa anachagua mwenyewe mfuko wa kujiunga nao.

Katika semina hiyo iliyoandaliwa na Mamlaka ya Usimamizi na Udhibiti wa Sekta ya Hifadhi ya Jamii (SSRA) washiriki walielezwa toka kuanzishwa kwa mifuko ya hifadhi ya jamii ni watumishi milioni 22 wamejiunga.

Akitoa mada kwenye semina hiyo, Meneja wa Rasilimali Watu wa SSRA, Teophory Mbilinyi, alisema lengo ni kupokea kero zinazowakabili wanachama wa mifuko ya hifadhi ya jamii.

Mbilinyi aliongeza kuwa SSRA ni chombo ambacho kimeanzishwa na serikali kwa ajili ya kusimamia mifuko ya hifadhi ya jamii ili iweze kutoa huduma bora ikiwemo kutoa mafao yao kwa wakati kwa waastafu.

Hata hivyo, meneja huyo alisema kila Mtanzania mwenye uwezo wa kufanya kazi anashauriwa kujiunga na mfuko wowote wa hifadhi ya jamii.

Mbilinyi alibainisha awali hakukuwa na udhibiti kwenye mifuko hiyo na hivyo mifuko iliendesha shughuli zao bila kusimamiwa, hali ambayo alisababisha kuwepo urasimu katika kuwajibika.

 Chanzo;;Mwananchi