Hakimu akutwa na majalada nyumbani

ALIYEKUWA Hakimu Mkazi wa Mahakama ya Wilaya ya Urambo, mkoani Tabora, Oscar Bulugu, anayekabiliwa na tuhuma tatu za kuomba na kupokea rushwa amekutwa na majalada zaidi ya 30 nyumbani kwake.

Taarifa iliyotolewa na Kamanda wa Taasisi ya Kuzuia na Kupambana na Rushwa mkoani Tabora, Fidelis Kalungura, ilileleza hakimu huyo alipekuliwa na maofisa wa TAKUKURU na kukutwa na majala 31 ya kesi mbalimbali.

Kalungura alisema TAKUKURU ilifanya upekuzi nyumbani kwa Hakimu Bulugu baada ya wananchi kupeleka malalamiko ya mara kwa mara wakidai kutotendewa haki na Mahakama ya Wilaya ya Urambo.

Katika malalamiko yao, wananchi walidai wanapofika mahakamani hapo wanakosa huduma kwa kuwa majalada ya kesi zao hayaonekani kwa makarani.

Kutokana na malalamiko hayo TAKUKURU ilifanya uchunguzi na walipokwenda kupekua nyumbani kwa hakimu huyo walikuta majalada hayo.

Habari  kutoka Mahakama  ya Hakimu Mkazi Mfawidhi wa Mkoa wa Tabora zimethibitisha kuwepo kwa  tukio hilo na kwamba  aliishasimamishwa kazi kwa mujibu wa sheria.

Aprili mwaka huu TAKUKURU mkoani hapa ilimkamata na kumfikisha mahakamani Hakimu Bulugu kwa tuhuma za kuomba na kupokea rushwa ya sh milioni tano.

Chanzo;Tanzania Daima