WAKULIMAWA TUMBAKU ATENGA MIL.5.1/- ZA UMEME

CHAMA cha Msingi cha Wakulima wa Tumbaku katika Kata ya Kisanga wilayani Sikonge mkoani Tabora kimetenga sh. milioni 5.1 za mauzo ya tumbaku kwa msimu wa 2013/2014 kwa ajili ya kutunisha mfuko maalumu wa kuweka umeme katika kata hiyo yenye vijiji 3.
Hayo yalibainishwa na Mwenyekiti wa chama hicho, Rashid Mazinge, katika taarifa yake kwa waandishi wa habari waliotembelea kijiji hicho wiki iliyopita. Alisema chama hicho chenye wanachama 700 kimekusudia kuweka umeme katika makao makuu ya kata hiyo yaliyoko katika kijiji cha Kisanga na vijiji vyake na kwa kuanzia wameanzisha mfuko maalumu wa umeme kwa ajili ya kutimiza lengo hilo.
Alisema wametenga kiasi hicho cha fedha kwa ajili ya maandalizi ya awali ambapo wataanza kwa kununua vifaa mbalimbali vya umeme ikiwemo vifaa vya kompyuta na printa vitakavyosaidia kurahisisha shughuli mbalimbali za kiofisi katika ofisi ya chama hicho, tayari kompyuta kadhaa zimeshanunuliwa.
"Ndugu waandishi wa habari, tumekusudia kuweka umeme katika kijiji chetu ndiyo maana tumeanza kukusanya fedha na kuzitunza kama wanakikundi, muda si mrefu tutaenda wilayani kufuatilia taratibu zingine, tunaomba na ninyi mtusaidie huko wilayani ili tufanikiwe haraka", alisema.
Alibainisha kuwa chama kimefikia hatua hiyo baada ya kupata mafanikio makubwa katika msimu wa 2012/2013 na 2013/2014 hali iliyowafanya wanachama wake kwa kauli moja kuridhia haja ya kuanzishwa mfuko huo ili kujiletea maendeleo katika kata hiyo yenye vijiji 3 (Utyatya, Mwamayunga na Kisanga).
Katika msimu wa 2012/2013 chama hicho kilizalisha jumla ya kilo 940,049 za tumbaku zenye thamani ya dola za Marekani 2,538,132 (sawa na sh. bilioni 4.1) na mapato ya ushuru yalikuwa dola za Marekani 65,000 (sawa na sh. milioni 103.4), kwa mapato hayo waliweza kulipa deni la pembejeo la dola 692,000.(sawa na sh. bilioni 1.1) kutoka benki ya NMB na kubakiwa na fedha ya kutosha.
Aidha katika msimu wa 2013/2014 walilenga kuzalisha jumla ya kilo 1,400,000 zenye thamani ya dola 3,920,000 sawa na sh bilioni 6.3 na mapato ya ushuru walilenga kukusanya dola 98,000 sawa na sh. milioni 156.8 hali ambayo itawawezesha kulipa deni la pembejeo dola 968,000 sawa na sh. bilioni 1.5 toka NMB.
Alitaja mafanikio ya chama hicho kuwa ni kuanzishwa mfuko wa ujenzi wa ghala la kuhifadhia tumbaku ambao umetengewa kiasi cha dola 31,000 (sh milioni 49.3), ujenzi wa ofisi ya kata ambapo chama hicho kimechangia sh. milioni 3, kuanzisha mfuko wa umeme, kuanzisha KISANGA SACCOS LTD ambayo mpaka sasa ina jumla ya dola 21,000 (sawa na sh. milioni 33,495,000).
Alisema chama hicho kimedhamiria kufanya mambo makubwa ya kimaendeleo kupitia vikao mbalimbali vya wanachama wake ambapo kimetenga sh milioni 30 kwa ajili ya ununuzi wa gari aina ya FUSO ili kurahisisha huduma mbalimbali za wakulima kijijini hapo, pia kimekusudia kukusanya dola 84,000 (sh. milioni 134,000,000) ili kuongeza nguvu ya SACCOS yao.
Pamoja na mafanikio hayo zipo changamoto kadhaa zinazowakabili ikiwemo mikopo na bei kubwa za pembejeo, ucheleweshaji na upatikanaji wa pembejeo hizo, kutokuwa na umeme, ubovu wa barabara zinazounganisha vijiji hivyo, ukosefu wa maji safi na salama, ukosefu wa nyumba ya mganga wa zahanati na kituo cha polisi.
Diwani wa kata hiyo Abdallah Msumeno mbali na kupongeza hatua ya chama hicho kutenga sh. milioni 2 kwa ajili ya kununua viti 100 vya plastiki na kutenga sh 576,000 za michango ya wanachama katika mfuko wa NSSF pia ametoa wito kwa wakulima hao kufuata kalenda ya msimu wa kilimo ili kupata mafanikio zaidi.

Chanzo:Majira