WILAYA YA SIKONGE YAPONGEZWA

HALMASHAURI ya Wilaya ya Sikonge mkoani Tabora imemwagiwa pongezi kwa jitihada zake za dhati na uthubutu wa kuwainua vijana kwa kuwaanzishia kituo maalumu cha ujasiriamali kitakachowapa ujuzi wa aina mbalimbali.
Pongezi hizo zimetolewa na Mkuu wa Mkoa wa Tabora, Fatma Mwassa na wajumbe mbalimbali wa kamati ya ushauri ya mkoa katika kikao kilichofanyika wiki iliyopita mjini hapa.
Mwassa alimwaga pongezi hizo baada ya kufurahishwa na uanzishwaji wa kituo hicho cha vijana wilayani humo ambacho mpaka sasa kina vijana wakike na wakiume wasiopungua 100.
Alisema halmashauri ya wilaya hiyo ni mfano wa kuigwa katika mkoa huo na inastahili kupongezwa kwa kitendo chao cha kuthubutu kuanzisha kituo pasipo kuangalia changamoto zozote zilizoko mbele yao hususani gharama za kuwaweka vijana wote hao mahali pamoja kwa mwaka mzima.
"Ndugu wajumbe naomba niseme hili, Sikonge imetupaisha, ni halmashauri pekee hapa nchini iliyoonesha uthubutu wa kiwango cha juu katika kuhakikisha vijana wa kike na kiume wanawekewa utaratibu maalumu wa kuwainua kiuchumi, kwa kweli wamefanikiwa, naomba kila halmashauri iige mfano huo," alisema.
Alisema vijana hao tayari wameshaanza kupewa ujuzi wa aina mbalimbali wa stadi za maisha kupitia nadharia na vitendo katika maeneo ya ufugaji kuku, mbuzi na ng'ombe, kilimo cha kisasa cha mazao mbalimbali, utengenezaji mizinga na ufugaji nyuki wa kisasa.
Ujuzi mwingine unaotolewa na wataalamu mbalimbali kwa vijana hao ni ufyatuaji matofali kwa njia za kisasa, ufundi seremala, uashi na fani nyinginezo.
Aliwapongeza Mwenyekiti wa halmashauri hiyo Rober Kamoga, DC Hanifa Selengu, Mkurugenzi wa halmashauri hiyo Shadrack Mhagama, Mbunge Said Nkumba na Watendaji wote kwa jitihada zao za kuhakikisha vijana hao zaidi ya 100 wanapata mwanga mpya wa kimaisha ili wakawe walimu wazuri kwa vijana wenzao.
Kituo hicho kilichopewa jina la 'Pathfinder Green City' kimeshatembelewa na viongozi mbalimbali wa Serikali ya Jamhuri ya Muungano wa Tanzania akiwemo Waziri Mkuu Mizengo Pinda, Balozi Hamis Kagasheki na mawaziri wengine na wote walimwaga pongezi nyingi kwa uongozi wa wilaya hiyo sambamba na kuahidi misaada lukuki.
Aidha Mwassa aliagiza kila halmashauri katika mkoa huo itenge bajeti maalumu kwa ajili ya kuanzisha au kusaidia miradi mbalimbali ya vijana na katika mwaka wa fedha 2014/2015 kila halmashauri imetenga fedha kwa ajili ya shughuli hiyo kama ifuatavyo Sikonge sh. milioni 365, Kaliua sh. milioni 100, Uyui sh. milioni 240, Urambo sh. milioni 290, Nzega sh. milioni 150, Tabora sh. milioni 180 na Igunga sh. milioni 200

Chanzo;MAJIRA