VITUO VYA VIJANA VITASAIDIA KUKUZA SOKA NCHINI-CHAMBI.

 TAZAMA MATOKEO YA KIDATO CHA NNE 2013 HAPA

 Rashid Chambi akiwa ameshikilia moja ya vikombe ambavyo timu yake ya Chipukizi walinyakua.Picha na Hastin Liumba.

Rashid Chambi wa pili toka kushoto waliokaa mstari wa kwanza akiwa na timu ya Chipukizi,pia mwalimu wake na mchezaji wa zamani wa Timu ya Milambo Didas Kunde wa kwanza toka kushoto walioksimama.Picha na Hastin Liumba.

Na Hastin Liumba, Tabora

TANZANIA bado iko kwenye mapambano makubwa ili kuhakikisha soka lake linakuwa na kupata utambulisho kwenye medani ya kimataifa.

Aidha bado kumekuwa na kelele za kuhakikisha kuanza kwa misingi sahihi ya kuinua soka la vijana wa umri mdogo lakini bado mambo yamekuwa ni mabaya katika uamuzi kwenye mechi za ligi kubwa nchini Tanzania.

Rashid Chambi ni kijana wa umri wa miaka 14 ambaye ni kinda wa timu ya Chipukizi yenye vijana wa chini ya umri wa miaka 17  inayonolewa na mwanandinga wa zamani na beki wa timu ya Milambo ya Tabora Didas Kunde.

Chambi alihojiwa na gazeti hili katika mazoezi ya timu yake ya Chipukizi katika uwanja wa Chipukizi manispaa Tabora ambapo alielezea ni vipi anaona soka la vijana lilivyo nchini.

Kijana huyu licha ya kuonyesha uwezo mkubwa katika mashindano mbalimbali na mechi za mitaani amekuwa mwiba mkali kwa timu pinzani na kivutio kikubwa kwa mashabiki wa soka.

Anaanza kwa kusema endapo serikali,TFF na wadau nchini wasipowekeza kwenye soka la vijana bado nchi yetu haitapiga hatua kwenye medani ya soka hususani soka la kimataifa.

Chambi alisema tutapataje timu bora,wanasoka bora ama timu ya taifa itakayoweza kushiriki kimataifa bila kuwepo usimamizi mzuri toka ngazi ya chini hasa vijana kama yeye.

Alisema hadi sasa licha kushiriki mashindano ya Copa Coca-Cola na kucheza kwa mafanikio makubwa,anashukuru sana timu yake ya Chipukizi ambayo imemlea vyema toka amejiounga nayo miaka mitatu iliyopita.

Alisema kila mtu ana kipaji chake ambacho amepewa na Mungu ili aitumikie jamii inayomzunguka katika mazingira mbalimbali.

Aidha aliongeza kipaji hicho hasa kwa vijana kinahitaji kutunzwa na kuendelezwa ili kiwe na manufaa kwa nchi na aliyekitunza kwani ni kitu alichopewa mwanadamu kama tunu na mwenyezi Mungu.

Anasema wapo vijana wadogo wengi ambao wanavipaji vya hali ya juu vya kuitumikia jamii katika sehemu tofauti,lakini kutokana na mazingira yaliyowazunguka wameshindwa kuonyesha kuwa wanaweza.

Chambi anasema soka ni mchezo ambao unahitaji maandalizi ya kutosha hasa katika kuwaandaa vijana wa umri mdogo lakini bado kumekuwa na ubabaishaji kwenye soka la vijana hadi sasa.

“Nina imani kubwa endapo vijana wa umri mdogo wataandaliwa vyema kwa kuzingatia vipaji walivyonavyo watasaidia sana kwenye mashindano mbalimbali.” aliongeza.

Anasema ipo mifano mingi ya kujifunza na mingine amekuwa akiisoma kwenye majarida na Television hasa kwa nchi za Afrika za Libya, Nigeria na nyinginezo ambazo ziliweza kuwandaa vijana kwa muda mrefu na kufanikiwa kufanya vyema.

Alisema tatizo kubwa linalosababisha soka la Tanzania ni kutokuwathamini vijana wenye vipaji na badala yake siku zote kumekuwa na hulka ya kutumia wachezaji wanaoshabikiwa na mashabiki wao.

Chambi anasema vipaji vya vijana vinamalizwa kutokana na kutothaminika ama kutumika jambo ambalo mpaka sasa vijana wenye vipaji wamekuwa wakikata tamaa ya kuendelezwa.

Aidha anasema kumekuwa na jambo ambalo limekuwa likimshangaza kwani timu ya taifa siyo sehemu ya kwenda kujifunza mpira, siopokuwa ngazi ya vilabu ndiko mchezaji anapaswa ajifunze hasa ikizingatiwa mchezaji atakuwa amepitia mafunzo toka katika vituo vya vijana wadogo.

Alishauri serikali, wadau na shirikisho la soka nchini TFF, endapo tunahitaji timu bora ya taifa ama klabu hatuna budi kusimamia vipaji vya vijana ambao wanaweza kusaidia kwa siku zijazo.

Alisema vijana wengi ambao anawaona kwenye ligi kuu ya Vodacom Tanzania kuna vijana wadogo wanawaangaisha wazee kwenye ligi hiyo kubwa.

Alisema TFF inapaswa kutembelea mikoani kungalia vipaji vingi vilivyopo kuliko kila timu ya taifa inapotangazwa tunasikia wachezaji wengi wametoka Simba,Yanga na Azam tu.

Kukatazwa michezo mashuleni.

Anasema tatizo kubwa la soka nchini ni pale miaka kadhaa ya nyuma serikali iliamua kutoa tamko la kukataza michezo mashuleni.

Alisema katazo hilo lilichangia kuuaa vipaji vingi vya vijana na kurudisha nyuma juhudi za vijana wenye matarajio makubwa katika kuendeleza vipaji vyao.

Anasema kwa kiwango kikubwa sasa baadhi ya wachezaji wengi hawajitambui na tuwe na wivu kwa wenzetu kule ulaya wanavyokuwa na vyuo vya michezo kwa vijana,wanatunzwa na wanalipwa fedha nyingi.

Serikali iunge mkono jitihada za vijana.

Chambi aliongeza kuwa serikali inapaswa kuunga mkono jitihada za vijana wenye vipaji ambao wamekuwa wakivionyesha kwenye timu zao hasa mashindano ya Copa Coca-cola.

Alisema serikali imejiweka kando katika kusaidia timu za vijana, timu za taifa na mashindano mbalimbali hali ambayo inachangia timu zetu zinashindwa kufanya vizuri.

Nini kifanyike.

Anasema ili mchezo wa soka ufanikiwe ni vyema serikali ikasaidia moja kwa moja kama ilivokuwa zamani na timu za vijana chini ya miaka17 iwe chini ya serikali.

Aidha alisema wachezaji nao wanapaswa kushauriwa vyema ili waweze kuelewa majukumu yao nje na ndani ya uwanja tofuuti na sasa wachezaji wengi wamekuwa watovu wa nidhamu.

Uimarishaji vituo vya vijana.

Chambi aliongeza ili kufikiwa malengo na njia sahihi vituo vilivyopo vipatiwe walimu tofauti na sasa vituo kadhaa havina walimu wa kutosha.

Alisema uwepo wa walimu ni muhimu sana kwani kutasaidia sana kuwapa mbinu vijana ikiwemo namna ya kucheza soka lenyewe.

Alisema tukifanya haya kwa kuwekeza kwa vijana wenye vipaji tutafikia mahali swali tunalojiuliza kila siku la ‘kwanini Tanzania tunashindwa kufanya vyema kwenye soka’ halitakuwepo.

 Mikakati yake.

Anasema moja ya mikakati yake ni kuhakikisha kipaji chake kinazidi kuongezeka kwa kuendelea kujituma zaidi katika mazoezi, nidhamu ndani na nje ya uwanja na kufuata maelekezo ya mwalimu wake.

Aidha anasema kujiamini, kujituma, nidhamu na ushirikiano mzuri na wenzake vimemfanya aweze kufanya vyema kwenye mchezo wa soka hadi sasa.

Anasema hali hiyo ya kupenda soka aliendelea nayo hadi alipoanza darasa la kwanza mwaka 2006 akiwa shule ya msingi Isike ya mjini Tabora.

Hata hivyo anasema licha kupenda mchezo wa soka bado amekuwa akifanya juhudi kubwa kwenye masomo darasani kwani anaamini kuwa soka la sasa bila elimu ni kazi bure.

Rashid Chambi ni mwanafunzi wa kidato cha tatu katika shule ya sekondari Kanyenye iliyopo manispaa Tabora,alizaliwa mwaka 1999 pia ni mkazi wa Kata ya Mwinyi.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.