WACHIMBAJI NZEGA WAAHIDI NEEMA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

SERIKALI imewaahidi wachimbaji wadogo wa Kitongoji cha Mwanchina, wilayani Nzega, Tabora kuwatafutia eneo la kuchimba pamoja na kuwaagiza waunde vikundi vitakavyoweza kupatiwa leseni.

Akizungumza na wachimbaji wadogo juzi, Naibu Waziri wa Nishati na Madini, Steven Masele, alisema serikali imesikia tatizo hilo na ufuatiliaji unafanyiwa kazi, ili waweze kupata eneo maalumu la kuchimba dhahabu, ili  waendelee na shuguli zao za kujipatia kipato.

Aliwataka wachimbaji hao kuteua watu watano watakaokuwa wawakilishi wao ambao wataungana na serikali ya wilaya na mkoa katika kukaa vikao mbalimbali vya kutatua tatizo hilo, ikiwa na kutengewa eneo la kuchimba.

Masele alisema baada ya kukamilisha zoezi hilo wachimbaji hao waunde vikundi vitakavyoweza kupewa leseni ya kuchimba dhahabu katika maeneo watakayopewa.

“Sisi kama serikali na wizara dhamira yetu ni kuhakikisha wachimbaji wadogo wanapatiwa leseni kutokana na makazi yao wanayoishi na zoezi hilo lazima litengenezewe utaratibu mzuri, lengo ni kutoa migogoro,” alisema.

Awali, Mkuu wa Mkoa wa Tabora, Fatuma Mwasa, alisema kilio cha wachimbaji hao kimesikika hadi kusababisha Naibu Waziri wa Nishati na Madini kuwasili kusikiliza kero zao na kuzipatia ufumbuzi.

 Chanzo;Tanzania Daima